Աստղիկ Բլեյանն իրիկվա հետ ուրիշ է դառնում, ավելի ու ավելի, որքան քնի ժամը՝ ինը, մոտենում է․․․ Էս մանկապարտեզի հրեշտակը սկսում է գզել մորը, Դավթին․․․ Արմինեն ու Դավիթը միավորում են իրենց ուժերը, որ իմ հմայիչ գազանից պաշտպանվեն․․․ Աստղիկն իսկական գիշատիչի պես, որսի հոտ է առել, չի՛ նահանջի․․․ պահանջում է իր ուզածը՝ մայրիկից կաթ, եղբորից՝ հնազանդություն խոնարհ։ Մեկ էլ, թե՝ պապայիս կասեմ․․․ Դավիթը շարունակ քրոջով հիանում է․ – Աստղի՛կ, հայրիկը ամեն ինչ տեսնում է, ի՜նչ պիտի ասես․․․ Դե՛, ասա․․․
Աստղիկը կտրուկ մոտենում է ինձ ու սկսում բողոքել․․․ լացակումա՜ծ․․․ երգեցի՜կ․․․
– Պապայի՜կ, Դավի՜թը․․․ մայրի՜կը․․․
Իմս վայելքն է, որ ուզում ես՝ երկար տևի․․․ մինչև քնելը․․․ 

«Գագարին» պրոյեկտի Վարսեր, Գեղամավան համայնքների դպրոցներում մեր երեկվա հանդիպումներով մենք ստացանք վստահության քվե՝ գործելու։ «Դար» հիմնադրամի զարգացման ծրագրով գործընկերությունը հաստատելու, մեր համատեղ հանրակրթության փոփոխությունները մշակելու և իրականացնելու համար մեզ բավականաչափ ճանաչում են պրոյեկտի Զովաբեր, Դդմաշեն, Ծաղկունք, Գեղամավան, Վարսեր համայնքներում, Սևան քաղաքի Գագարին ավանում․․․ Ապրիլի 12-ի ճանաչողական հանդիպումը կրթահամալիրի Բանգլադեշում, այսպիսով, պրոյեկտի մասնակիցների կողմից հարգանքով ընդունված է։

Երեկվա նախագծային խումբը՝ կազմված Արևմտյան դպրոցի սիրելի—հայրենագետ եռյակից՝ Սոնա Փափազյան, Աչեր Բաստաջյան, Արմինե Գոգինյան, «Դար» հիմնադրամից՝ մեզ ճամփի հուսալի աջակից դարձած Արմենուհի Վանոյան մասնագետ, լավ պատրաստված էր օգտակար հանդիպումների համար։ Այս շրջանում Բլեյան ցանցով անցկացված առցանց բաց հանդիպումները իրենց բարերար—ճանաչողական դերը կատարել էին․․․ Վաղը առանց այդ հանդիպումներին միանում են սովորողներն իրենց ազատ ընտրությամբ, անցնում ենք պրոյեկտի դպրոցների նախաձեռնող անհատների, խմբերի առաջարկներին, նախագծերին։ Տարբեր էին, հետաքրքիր, իրար լրացնող մեր հանդիպումները Վարսերում ու Գեղամավանում, ինչպես մեր գնալու—վերադարձի ճանապարհները, որոնք ինքնին արժեքավոր են մեր հետագա անընդհատ գործունեությանը, նաև սեբաստացիների հայրենաճանաչմանը լիարժեք ծառայեցնելու առումով։ 

Արևմուտքի ընդունակ—յուրահատուկ աղջիկների եռյակի պատումներն իմ գրով ես չեմ փոխարինի, չեմ մրցի, դրանց ես անհամբեր սպասում եմ. մենք մեկ նախագծային խումբ ենք, սա է հենց ձեռքբերումներից կարևորը, հիմքը մեր գործընկերության հաջողության։ Գարիկ Հակոբյան հմուտ ուղեկիցը Հրազդանից մեր ճանապարհը թեքեց Քաղսի—Բջնի Նուռնուսի կամրջով, Սոլակ—Բջնիի ջրերում արդար հացի սովորույթի հաստատում եղավ։ Հրազդան գետի ակունքից՝ Սևանա լճից մինչև Արաքս գետաբերան՝ 2021-ի հունիս—հուլիսի ուխտի ճանապարհի հետազոտումը սկսված է։ Միացե՛ք։

Դդմաշենում հիշարժան կանգառ ունեցանք․․․ Իջել էինք, որ Աչերը, որն ավարտում է իր երրորդ երաժշտական մասնագիտական դասընթացը, որպես Կոմիտասի անվան կոնսերվատորիայի մագիստրոս երգեցողության, մեզ համար երգի Դդմաշենի նշանավոր եկեղեցում․․․ Սոնան միացավ Աչերին, ու ոգեղեն դուետը հնչեց ինքնաբուխ՝ ունենալով գյուղի յոթերորդցիների խորոտիկ աղջկական խումբ ունկնդիրներ. ինքնաբուխ մասնակցներով ուսումնական պատարագը հեղինակային մանկավարժությամբ մեր օծումի արժեք ունեցավ․․․ Հետո միասին մաքրեցինք եկեղեցու բակը, 23 հոգիանոց յոթերորդ դասարանցիների խմբին կրթահամալիրի Արևմուտքը անհատական այցի հրավեր ուղարկեց․․․

Գեղամավանում պայմանավորվեցինք գործող «Արմաթ» լաբորատորիայի և Հերմինե Անտոնյանի ՏՏ լաբորատորիայի սովորող—սովորեցնող խմբի հավաք անցկացնել կրթահամալիրում ու Գաղամավանում՝ փոխեփոխ։ Իսկ Վարսերում Գագարին պրոյեկտին ուղղված նոր առաջարկ ծնվեց՝ նրա «Լավաշի փառատոնին» մասնակցեն պրոյեկտի դպրոցներն իրենց դպրոցական թոնիրներով, սեղանատներով, մառաններով․․․ Բլեյան դպրոցները ևս, իհարկե։ 

#2029