Հարգելի պարոն Մարգարյան
Հարավարևմտյան զանգվածի Առնո Բաբաջանյան պողոտայի վերգետնյան, որը կառուցվել է Հարավարևմտյան զանգվածի Բ-1 և Բ-4 թաղամասերի միջև, տարատարիք, բազմաքանակ մարդկանց շուրջօրյա անվտանգ անցումն ապահովելու համար, իր նպատակին սկսել է չծառայել: Բ-4 թաղամասում Բաբաջանյանին հարակից մայթեզրը վերածվել է բանուկ փողոցի, վտանգավոր դարձնելով վերգետնյա անցումով մուտքը «Յուրի Բախշյան» մանկական այգով Բ-4 թաղամաս: Ամեն օր կրթահամալիրի Բ-4 թաղամասի Դպրոց-պարտեզի, Բ-1 թաղամասի Նոր դպրոցի, Գեղարվեստի դպրոցի, Մայր դպրոցի հարյուրավոր երեխաներ, 5 տարեկանից սկսած, վտանգում են իրենց կյանքը՝ անցնելով Բ-4 թաղամասից Բ-1, Բ-1 թաղամասից Բ-4 այս՝ օրեցօր անկառավարելի դարձող հանգույցով։ Ինչո՞ւ է սա կայանատեղի դարձել թիվ 71 երթուղայինների, մարդատար տաքսիների, «Ֆուդ» սուպերմարկետի և հարակից խանութ-արհեստանոցների համար: Մարդկանց մասին մոռացա՞նք, մոռացա՞նք «Յուրի Բախշյան» մանկական այգու և վերգետնյայի կառուցման ուրախությունը, որ դրանք պիտի երկարատև ծառայեն հազարավոր երևանցիների: Ծնողներն արդեն հրաժարվում են երեխաներին թողնել դպրոց կամ արգելում են երեխաների՝ ուսումնական պլանով, կրթական ծրագրերով որոշված տեղաշարժը «անվտանգ չէ, ավելի ու ավելի վտանգավոր է» հիմնավոր պատճառաբանությամբ: Իսկ լուծումը կա՝ պարզ է ու անհետաձգելի: Վերգետնյայից «Յուրի Բախշյան» մանկական այգի 10-15 մետրանոց անցումը պիտի լինի միայն հետիոտնի համար՝ փակ որևէ տրանսպորտային փոխադրամիջոցի առաջ: Խնդրում եմ ուղարկեք Ձեր ներկայացուցչին՝ տեղում մեր առաջարկը քննարկելու:
