Հինգ օր անընդհատ գործում ես երկիր Բանգլադեշումդ, ստեղծման տերունական օրինակով-պատվիրաններով, 6-րդ օրը շրջում մեծ երկրով՝ Հայաստան աշխարհով, ներկայացնում ստեղծագործությունդ, տարածում ստեղծականությունը, հավեսը, կյանքը… Դրախտի տարածումը երկրով մեկ ո՞ւմ գործն է, եթե ոչ՝ ստեղծող-արարածի…. Եվ ահա 7-րդ օրը՝ կիրակի…
«Այսպիսով Աստված ստեղծեց երկինքն ու երկիրը և կարգավորեց դրանք։ Աստված վեցերորդ օրն ավարտեց արարչագործությունը և իր կատարած բոլոր գործերից հետո՝ յոթներորդ օրը, հանգստացավ։ Աստված օրհնեց յոթներորդ օրը և սրբագործեց այն, որովհետև այդ օրը Աստված հանգստացավ իր այն բոլոր գործերից, որ սկսել էր անել»:
Գիրք Ծննդոց: Եդեմի-պարտեզը։
Շաբաթը Գյումրիում:
Լուսանկարները՝ Քնարիկ Ներսիսյանի, Լուսինե Աբրահամյանի:
Սկսեք կիրակի օրվա գիրը Գիրք Ծննդոցով, ստեղծագործության պատմությամբ… Ո՞րն է վեճը. որ մենք ունենք աստվածային-ազնվական ծագո՞ւմ, որ մարդ ենք մե՞նք՝ ստեղծված Աստծո՞ կողմից, նրա կերպարանքո՞վ ու նմանությամբ… Ո՞րն է սրա այլընտրանքը… որ կապի՞կ է մեր ոմն նախահայրը… Կներեք։ Տեր Աստված մարդուն ստեղծեց երկրի հողից, նրա դեմքին կենդանության շունչ փչեց, և մարդ եղավ կենդանի էակ։ Մնացյալը, որ եղավ-կա, այս կենդանի էակի գործերն են… Ի՜նչ սիրուն պատմություն է, զարմանալի՜ աշխարհ… Հանգստացե՛ք ընկերներ, կիրակի է… հալալ է։ Իմ ու Դավթի այս կիրակին, օրինակ, սև թութով, Շուշիի մեր հարազատ Նալբանդյան-Խաչատրյանների հետ…
Լուսանկարները՝ Արմինե Աբրահամյանի:
Կիրակնօրյա ընթերցարան
- Աշխարհում առաջին հեծանիվը՝ վազքուղով. դիտեք նաև տեսանյութը: Բոլորդ կամ հեծանվի վրա եք կամ այդ ճանապարհին, մեծ ու պստիկ սեբաստացիներ, որտեղ էլ որ կաք: Գնահատեք, սա ապագայի՞ հեծանիվն է: Բանգլադեշում ի՞նչ պահանջարկ կունենա:
- Ֆլորիդայում հայտնաբերել են Աֆրիկայի մարդակեր կոկորդիլոսներ:
Հայաստանում կոկորդիլոսներով չես վախեցնի, կոկորդիլոսը եղել և մնո՞ւմ է լավագույն դելիկատեսներից: Ինչո՞ւ Ֆլորիդայում մարդիկ չեն խժռում նրանց: Տեսնես՝ ի՞նչ արժե մի մարդակեր կոկորդիլոսը: - Յուրօրինակ գովազդային արշավներ, որոնք ստիպում են ժպտալ: Երեկ՝ Գյումրիում, ճամփորդության արշավի ժամանակ որքա՜ն բնական ժպիտ կորզող, ոչ գովազդային վիճակներ եղան: Այս մասին իմ վաղվա գրում:
- 17-ից ավելի լուսանկարներ: Հունիսի 13-17-ի կինո ֆոտո փառատոնին կհայտնվե՞ն այսպիսի ծիծաղելի լուսանկարներ ու ֆոտոշարքեր: Բանգլադեշում կյանքն այնքա՜ն ուրախ է:
- Տրամադրություն բարձրացնող մեր մոլորակի ամենավառ քաղաքները: Մեր կրթահամալիրի Բանգլադեշի վառ-վառացումն սկսել ենք Գեղարվեստից: Մի շաբաթ օր էի բացակայել, սիրտս ուզեց տեսնել մեր քոլեջի ուսանող Աննա Սմբատյանի վառվռուն պատը: Տեսանք, հենց Գյումրիից մտանք Երևան: Բանգլադեշի հունիսյան պլեներում քա՞նի այսպիսի վառվռուն պատ ու անկյուն կունենանք: Չոգևորեցի՞… Շուտափույթ ապաքինում մեր վառվռող Կարինե Մացակյանին:
- Սիցիլիայում ժայթքել է Եվրոպայի խոշորագույն հրաբուխը: Ո՜նց չէինք իմացել. այդքան էլ տարվե՞լ կլինի Շիրակի Երերույքով, Ախուրյանի հովտով, Մարմաշենով: Մեր հրաբուխները մեր ներսում են, ողջ շաբաթ օրով քա՜նի հրաբուխ ժայթքեց:
- Իրան-Ադրբեջան սահմանային կամուրջ է կառուցվում: Տեսնո՞ւմ եք, մենք պատեր ենք կառուցում մեր հարևան Ադրբեջանի հետ, իսկ նա իր հարևանների հետ մինչ այս չունեցած կամուրջներ:
- Սա հրաբուխ է Հայաստանո՞ւմ: Գառնեցիները գյուղով կանգնում են ու գերա՞ն կոտրում: Սպասենք Կամենդատյան Միքայելի արձագանքին:
#679