Փետրվարի 13-ին, ժամը 16-17-ի արանքում, երբ Տեառնընդառաջի կիրակին էր ամենուր բոցկլտում, ես 2016-ին առաջին անգամ հեծա իմ անվավոր ձին…Թեթև և սլացիկ, Մեդիակենտրոնից մինչև մեր տուն` Խանջյան, Երևանի աշխարհագրական կենտրոն, ծիսական պտույտով…
Իսկ շաբաթն աշխատանքային էր, երկու մասով, ինչպես եղել է 2015-ի բոլոր շաբաթներին… Մայր դպրոցում, աշխարհից թաքցնեմ սեբաստացիներից ինչպե՞ս և ինչո՞ւ… ավարտին են մոտենում մենամարտական խաղերի` ըմբշամարտ-ձյուդոյի մարզադահլիճի ձևավորման աշխատանքները, որով մեր կրթական ծրագրով ռազմամարզականի նյութական միջավայրը կամբողջանա: Կարևոր է, որ մեր դեռահաս պատանիները ճարպիկ, ուժեղ լինեն, լիարժեք տիրապետեն իրենց մարմնին ու կարողանան ինքնավստահ լինել կյանքում, փողոցում, ինքնապաշտպանության ու բռնությունից այլոց` ծանոթ-անծանոթի պաշտպանության ժամանակ, իրավաչափ ու հարկադրված գործողություններով…
Դավիթ Բլեյանը եղբայրների հետ պատրաստվում է մարմնամարզական ստուգատեսին:
Լուսանկարները` Աննա Բլեյանի:
Գեղարվեստի շենքի ողջ երկայնքով ձգվող 800 մ² նկուղը ամիսներ հետո կվերածվի պատանեկան ակումբների, արվեստանոց-լաբորատորիաների համալիրի` ձուլված գեղարվեստի միջավայրին, ազատ ելումուտով դեպի ներքին բակ, տանիքով ու շենքի ինտերյերով յուրահատուկ միջավայր` ապահովելով գրավիչ-ուսումնական աշխատանք տասնյակ պատանիների համար… Կարևոր նախագծի խելամիտ մշակումն է մեր ունեցած վարձի և տաղանդի ողջ ուժով արտահայտվելը, որ լինի բեկում ամեն մի նախաձեռնությամբ…
Շաբաթվա իմ անբաժան ընկերների` Սուսան Մարկոսյանի ու Գևորգ Հակոբյանի հետ էր աշխատանքային երկրորդ հատվածը. իդիլա, ոչ ոք չի խանգարում բազմազբաղ–սրընթաց շաբաթն իմաստավորելու և նույնպիսի ընդգրկուն ստուգատեսյան շաբաթ նախագծելու համար… Ստուգատեսային-նախագծային ուսուցման մեր հեղինակային կրթական ծրագիրը, որով մենք ապրում ենք, պահանջում է ոչ միայն ուսումնական տարվա, ամսվա տոնացույց-կազմակերպիչ, այլև օրացույց կազմակերպիչ: Դա պահանջ է. կունենանք…
Ուրախացա` Գեղարվեստում հանդիպելով Կարինե Մացակյանին, Արմինե Թոփչյանին, դաստիարակ Օլյա Մանդալյանին, դաստիարակի օգնական Տաթև Աթոյանին` վրձինները ձեռքերին: Ծիծաղեցինք Արմինեի հետ` ուրիշ է կամավորական-ազատ աշխատանքը, թե չէ տնօրինական թելադրանքով ո՞վ չի կարող գործել…
Լուսանկարները` Արմինե Թոփչյանի:
Իսկ երեկոն հայտարարված է վաղուց. Լիլիթ Բլեյանն` իր երաժիշտ ընկերներով, Ուլիխանյան ակումբում է: Ակումբը նորացված, լսարանը` ծանոթ-անծանոթով, մտերմիկ… Իմ կողքին` իր 35 ամյակը նոր բոլորած Առնոլդ Բլեյանն է, ում Լիլիթի առաջարկով դահլիճն է ծափահարում, պայծառ, ավելի ու ավելի վառ Շուշան աղջիկը ու Աննա Բլեյանը, ով ականջիս մեջ կարդում է.
— Հոպար, դու գիտես երեխաներից գոհ լինելու, նրանցով պարզերես ապրելու կյանքը…
Ինչ ճիշտ է, ճիշտ է:
Լուսանկարները` Առնոլդ Բլեյանի:
Աշոտ Տիգրանյանը պնդում է, որ 2016-ի փետրվարի 12-ին Հավանայում Հռոմի պապ Ֆրանցիսկոսի, Մոսկվայի և Համայն Ռուսիո պատրիարք Կիրիլի հանդիպման արդյունքներով համատեղ ընդունած այս փաստաթուղթը յուրաքանչյուր չափահաս սեբաստացի կարդա ամբողջությամբ: Կարծում եմ Տիգրան Հայրապետյան հասարակագիտական ստուգատեսի օրերին կունենաք դրա պատասխանը՝ հենց առաջարկի հեղինակից: Հայերեն չգտանք՝ կարդացեք օտար լեզվով:
Օրագրի ընթերցարան
- Չինաստանում վայրի փիղը ճանապարհին…
- NASA-ն ցույց է տվել մարտի 8-ի արևի խավարման անիմացիան
- 10 իմաստուն մտքեր Կոնֆուցիոսից
- Ընդունենք Տիրոջ հրավերը՝ գնանք Նրան ընդառաջ
- Ամենատարօրինակ 5 վայրերը, որտեղ Wi-Fi կա
Ֆոտոխմբագիր`Արփի Սահակյան
#583