Մեր 2020-2021 ուսումնական տարվա հինգ տարեկանները, որ 2021-ի հունվարով, նոր տարով դարձել են վեց տարեկան, ո՞նց են այսքան հասուն—կարող, ամենուր կրթահամալիրում, ոչ միայն հյուսիսի, հարավի, արևելքի, արևմուտքի սեբաստացի դպրոց—պարտեզներում, այլև քոլեջում մեր․․․ Երեկ քոլեջում ես նրանց հանդիպեցի՝ այնքա՜ն կլանված Թերեզ տեխնոլոգի հետ ստվարաթղթերով կերպավորման աշխատանքներում։ Իսկական Ռոդարի դպրոց՝ երևակայություն ու ստեղծականություն. նրանք կարողանում են թափոն համարվող ստվարաթղթերով—ներկերով—գործիքներով նոր աշխարհ ստեղծել, մեծերի ստեղծած այս կոշտ—կոպիտ—տձև իրականության մեջ նրանք չեն պատրաստվում ապրել։ Ու այս թեթև—ուրախ հորինումը ծնում է շարժում, ձայն․․․ հավես․․․ Տեսեք ու լսեք։ Այսօր հիգշաբթի է՝ օրացույցով՝ շաբաթվա 200-ի չափ սեբաստացիների ստուգատեսային օրը։ Ավելի ուշադիր եղեք, մեծե՛ր, խնդրում եմ։ 

Այսպիսի թեթև—ուրախ՝ ստեղծականության—երևակայության դպրոց ներկայացավ իր հերթական ծնունդով կրթահամալիրի բրուտանոցը։ Հերթական եմ ասում, քանի կրթահամալիրային այս ծնունդը, որպես առաջին նվաճված նկուղային տարածք մայր դպրոցում, երեսուն և ավելի տարիներում քանի՜ նորացում—թարմացում—զարգացումով, տեսեք՝ ինչ դարձավ՝ ներսով—դրսով, հյուսիսային ու հարավային մուտքերով, փառատոնային քանդակագործական պուրակով, Սասնալանջով դեպի Գեղարվեստ՝ Վիգեն Ավետիսի քանդակի դպրոց, ոսկերչական լաբորատորիա ու կրթական պարտեզի արևելք՝ քոլեջ, շարունակվող մասնագիտական ուսուցումով․․․ Ու իմ կոչը, որ առաջացավ տեղում, որ իրեն բնորոշ նրբանկատությամբ—բարեխիղճ գրանցեց ու ձեզ, յուրաքանչյուր սեբաստացու հասանելի դարձրեց Քնարիկ Ներսիսյանը, իմ այս գրով նաև լսեք—լսեք—լսեք ու տարածեք․․․ որ Հոգատարության ուսումնական նախագիծը համապարփակ—սեբաստացիական գործի իմ, ձեր ստեղծած նյութական ու ոչ նյութական արժեքների հանրայնացմամբ—հանգանակությամբ, դառնա մեր ստեղծումի տասանորդը՝ հատկացումը հայրենիքին մեր։ 

Լուսինե Բուշի առաջարկը՝ արևմուտք նայող հանդերձարանը պարի ասպետը դարձած Լաերտի անկյուն—պարասրահի վերածելու, ընդունելի է մի պայմանով, որ ավագ դպրոց—վարժարանի հետ, որպես 2021-ի կարևոր նախագիծ՝ սկսում եք նոր հանդերձարանը մայր դպրոցի նկուղային վերջին չօգտագործվող տարածքում․․․ Կրթահամալիրի տնօրեն Սուսան Մարկոսյանի իրավական արձանագրումը իմ գրով այս, հենց հիմա, այս տարածքում այս է. միջին, ավագ դպրոցների հանդերձարանների կառուցումը՝ անհատական պահարաններով, նախատեսված է կրթահամալիրի նյութական միջավայրի 2021թ. զարգացման—բարելավման աշխատանքներում։ Խնդրում եմ կարգով սահմանված նախահաշվի, հայտի բերել առաջարկը։ 

Արատեսում բնության գրկում մեր դպրոց—դպրական կենտրոնի վառելափայտն ավարտվել է, իսկ նախագծային խմբերը մարտի 20-22-ին Աննա Երիցյանի «Ակների», 22-24-ին քոլեջի Էլյա Սահակյանի, դպրական կենտրոնի բլոգում—օրացույցում շարվել են ճամփի․․․ Սմբատ, Էդմոն, Էրիկ, Գևորգ․․․ հենց մեկնողներ, մեր պահեստավորած, կրթահամալիրի պարտեզի ծառերի աշնանային էտից առաջացած փայտը հասցրեք Արատես․․․ Արատեսի համար քանդակագործ Մուշեղ Բարսեղյանն ու իր հայրիկն առաջարկում են նոր որակի մետաղի վառարաններ․․․ 

Ջուլի Սիմոնյանը, Էլյա Սահակյանը, Զառա Առաքելյանը Գագարին պրոյեկտով իրենց մեկօրյա աշխատանքային այցն ինչպես սիրով—մոբիլ ներկայացրին մեդիայում, այդպես էլ անցան ձեռք բերված պայմանավորվածությունների կատարմանը՝ թեթև—ուրախ․․․ Բլեյան կրթական ցանցով մեր հեղինակած մանկավարժությունը տարբեր խողովակներով չի կարող շարունակ չհոսել Հայաստանով մեկ, Հայաստանից դուրս, եղել ենք ու կանք բաց համակարգ, առանց տարածքային—լեզվական սահմանափակումների․․․ 

Այո, գործը բազմապատկվում է ու չի ծանրանա. թեթևությունը մեր գործողությունների, դրանց բերած ուրախությունը—հասցեականությունը մեր այս ցանցային տարածման ցուցանիշներ դիտեք, խնդրում եմ։ 

Դավիթ Բլեյանին առաջադիմելու համար վերջապես անգլերենի ուսուցիչը գովել է՝ և՛ բանավոր խոսքի, և՛ գրավորի համար։ Կան նաև իրեղեն ապացույցներ։ Եվ սա կատարվեց սենսեյ Հայկուհի անգլերենի ուսուցչի օրոք։ Երեկ երեկոյան այս լուրը տարածվեց Դավթի քույրերով և հասավ Վիեննա՝ Շուշան Բլեյանին։ Քույրիկ Շուշանը պայծառացավ, ծաղկեց… մեղր էր ծորում իր ու Դավթի խոսակցությունից։ 

#2016