Զատկական, իհարկե, բայց կիրակի է: Իմ օրագրի համար սովորական դարձած կիրակնօրյա գիրը, որպես ընթերցարան, ներկայացնում եմ: Զատկից առաջ, Զատկի օրերին, Զատկից հետո էլ, ամեն օր, եթե զատվելու խնդիր ունենք, ապա՝ ծուլությունից, մեխանիկականությունից, անհավեսությունից: Զատկական օրերին՝ ապրիլի 4-ին, 5-ին, 6-ին, երևա՞ց մեր սեբաստացիական ծրագիրը` իր ճաշակով և բովանդակությամբ, սեղանի ձևավորումով, նոր նախագծի, նոր ձեռնարկի նախապատրաստումով: Մի՛ ալարեք, պատմե՛ք, ներկայացրե՛ք, ուրախացրե՛ք:
Շնորհակալ եմ Արմինե Թոփչյանին, Սուսան Մարկոսյանին, Մարիետ Սիմոնյանին, Շուշան Բլեյանին, իրենց ֆոտոշարքերով իմ կիրակնօրյա պատումը տեսքի բերելու համար: Եվ իհարկե, Մարգարիտ Սարգսյանին՝ իր ծնունդով զատկական այս օրը անձնական տոն դարձնելու համար:
- Ավստրալիայում հաջողվել է լուսանկարել ծովի հազվադեպ լուսարձակումը: Այ, մեր դիտարան-դիտակետերը կկարողանա՞ն անընդհատության ռեժիմում Արագած-Արարատի հազվադեպ բնական տեսարաններ-երևույթներ լուսանկարել:
- Համակարգչային խաղերն օգնում են սովորելուն. ուսումնասիրողները պնդում են, որ համակարգչային խաղերը ոչ միայն հետաքրքիր, այլև օգտակար կարող են լինել:
- Ամենազվարճալի գովազդային հոլովակների հիթ-շքերթը: Մայիսյան հավաքին ընդառաջ գուցե մեր կինոֆոտո ակումբի սաների համար զվարճալի-օգտակար կլիներ հավաքից հավաք մեր մեդիայից ամենատարբեր շարքեր անել… օրինակ՝ ամենա….
- Հայկական սփյուռքը Թուրքիային կոչ է անում բացելու սահմանը («Թարգմանիր»): Ապրիլյան ընթերցման հետաքրքիր նյութ է…
- Այլևս երբեք չեք նետի բանանի կեղևը… Բանան Դավիթ Բլեյանը սիրում է, և մեր սեղանին միշտ կա… Շարունակ մտածել եմ կեղևների մասին՝ վստահ լինելով, որ դրանք զուտ կեղև են՝ պիտանի չեն… Այս նյութն ինձ զարմացրեց-հիացրեց…
- Պուտինը չի հասցնի Ղազախստանի, Բելառուսի և Հայաստանի նկատմամբ կիրառել «Ռուսական աշխարհի» գաղափարը… Սլավա Ռաբինովիչի այս մտքի և հարցազրույցի թեզերի հետ ես համաձայն եմ:
- Սխտորը դանդաղեցնում է ծերացման գործընթացը և պաշտպանում ուղեղը… Ինձ թողնես, ես սխտորը-սոխը մրգի պես, բողկի կամ խնձորի նման կուտեմ՝ ամեն Աստծու առավոտ… Ի՜նչ քիչ են հայերը սխտոր օգտագործում. խաշն էլ որ չլիներ…
- Նռան 10 անսպասելի հատկանիշները… Նուռն էլ հո սոխ չէ՞, և՛ տեսքն է տեղը, և՛ անուշ է: Հենց այնպես չէ, որ Նառա Նիկողոսյանը նռան պաշտամունք ունի…
Կիրակնօրյա պատկերասրահ
Կրթահամալիրի գյուղացիական ուսումնական տնտեսություն. քայլք-նախագծի ներկայացում-քննարկում
Լուսանկարները՝ Արմինե Թոփչյանի
Դպրոց-պարտեզի նախակրթարան. քուն
Լուսանկարները՝ Մարիետ Սիմոնյանի
Տեսարաններ Մայր դպրոցի տանիքից
Լուսանկարները՝ Մարիետ Սիմոնյանի
Շուշանը մեզ լսեց. ահա խոստացած նկարաշարը, այս անգամ` Վենետիկից:
