1. Հունվարի 27-ին, ժամը 19.00 երգի սրահ.

Դպրոցի տնօրեն Ա. Բլեյանը ծնողներին, ուսուցիչներին և հասարակության ներկայացուցիչներին ներկայացրեց տարրական կրթության կազմակերպման նոր նախագիծը:

Քննարկմանը մասնակցեցին հարյուրից ավելի մարդիկ: Օգտակար ու գործնական քննարկում էր՝ անսպասելի հուզական ու կազմակերպված:

 Պայմանավորվեցին.

1. Ընթերցարանում տեղադրել բոլոր գրավոր նյութերը՝ անհատական ծանոթացման համար:
2. Հանդիպել հաջորդ ուրբաթ՝ միջնակարգ կրթության կազմակերպման նոր նախագիծը քննարկելու:
3. Կազմակերպել լուրջ բանավեճ՝ երկլեզվության խնդիրների շուրջ:
4. Մեկ շաբաթվա ընթացքում ազատ լսումներ իրականացնել տարրական դպրոցում:

Առաջարկվեց

Նախագծում հաշվի առնել «Ծնողների հետ աշխատանքը տարրական դպրոցում» և «Տղամարդու և կնոջ դաստիարակությունը տարրական դպրոցում»:

2. Հունվարի 30-ին, ժամը 19.00, երգի սրահ

Հանդիպմանը եկել էին մոտ քսան 7-րդ դասարանցի և մի քանի այլ աշակերտներ: Թվում է՝ աշակերտներն ուզում էին ավելի շուտ համոզվել, որ տնօրինությունն իրոք լուրջ այդպիսի քայլեր է ձեռնարկում: Անսպասելի ուշիմ, հետաքրքրասեր ունկնդիր-քննարկողներ եղան մեր աշակերտները: Դպրոցի տնօրեն Ա. Բլեյանը մանրամասն ներկայացրեց տարրական դպրոցի գործունեության կազմակերպման նոր նախագիծը:

Պայմանավորվեցին.

1. Պարբերաբար անցկացնել այդ կարգի հանդիպումներ:
2. Բարձր դասարանցիները պիտի ժամանակ գտնեն այցելելու տարրական դպրոցի դասերին ու միջոցառումներին:
3. Արշակի հետ քննարկել անգլերենի ուսուցումն առաջին դասարանից սկսելու առաջարկը:
4. Մտածել տարրական դպրոցի աշակերտների բնագիտական կրթության, բնության երևույթների նկատմամբ նրանց բնական հետաքրքրությունների պահպանման միջոցների մասին:

3. Փետրվարի 03-ին, ժամը 19.00, փոքր դահլիճ

Տնօրեն Ա. Բլեյանը 80-ից ավել ծնողների, աշակերտների, մանկավարժների և լայն հասարակության քննարկմանը ներկայացրեց միջնակարգ կրթության կազմակերպման նոր նախագիծը: Կայացավ փոխվստահելի, գործարար և օգտակար քննարկում:

Պայմանավորվեցին.

1. Մեկ-երկու շաբաթվա ընքացքում ակումբի քննարկմանը ներկայացնել ավագ դպրոցի գործունեության կազմակերպման նոր նախագիծը:
2. Ըստ առարկաների սկսել ամբիոնային նոր ծրագրերի մշակման աշխատանքները՝ ելնելով նոր կոնցեպցիայից:
3. Մշակել ուսուցչի ու աշակերտի գործունեության գնահատման չափանիշներ:
4. Յուրաքանչյուր առարկայի գծով սկսել դպրոցական-հասարակական մասնագիտական խմբերի կազմակերպման գործը:
5. Փետվարի 6-ից 11-ն աշխույժ մասնակցել «Դպրությունը դպրոցում» շաբաթին:

4. Փետրվարի 17-ին, ժամը 19.00, փոքր դահլիճ

Տնօրեն Ա. Բլեյանը 60-ից ավելի ծնողների, աշակերտների ու մանկավարժների, լայն հասարակայնության քննարկմանը ներկայացրեց միջնակարգ (II փուլ) և ավագ կրթության կազմակերպման նոր նախագիծը: Կայացավ օգտակար քննարկում:

Պայմանավորվեցին.

1. Մարտի առաջին օրերին կրթօջախի խորհրդի քննարկմանը ներկայացնել կրթական գործի կազմակերպման դպրոցի ամբողջական կոնցեպցիան:
2. Հաջորդ ակումբի նիստին ներկայացնել կոոպերատիվների կազմակերպման հնարավորությունների մասին հարցը:
3. Արագացնել լեզուների, բազմալեզվության պրոբլեմի քննարկումն ակումբի նիստում:
4. Ողջունել և´ մայրենի լեզվի, և´ գրականության շաբաթի անցկացումը և մասնակցել շաբաթին:

5. Փետրվարի 24-ին, ժամը 19.00, փոքր դահլիճ

Թիվ 119 մանկապարտեզի վարիչ Հ. Գրիգորյանը ներկայացրեց իր մտորումները՝ աշակերտական-ուսուցչական կոոպերացիայի հետ կապված:

Պայմանավորվեցին.

1. Կոոպերատիվները դիտել որպես կրթօջախ-համակեցության կոոպերացիայի ձևակերպման միջոց:
2. Կոոպերատիվները թելադրված են մանկավարժական հասունացած խնդիրներ լուծելու պահանջից:
3. Ստեղծել այնպիսի կոոպերատիվներ, որոնք առավելագույն չափով օգտագործում են ուսումնական-դաստիարակչական գործընթացին նպաստող աշակերտի ձեռքի և մտքի աշխատանքը:

6. Մարտի 3-ին, ժամը 19.00, փոքր դահլիճ

Երկլեզվություն, թե՞ կիսալեզվություն: Ավելի լուրջ՝ եռալեզվության մասին:
Բանավեճը վարում էր Լևոն Ջռնազյանը:
Մասնակցում էր Ռաֆայել Իշխանյանը:

Պայմանավորվեցին.

1. Ռուսաց լեզվի ուսուցումը հայ երեխայի համար մանկապարտեզից սկսելը հանցագործություն է:
2. Ռուսաց լեզվի ուսուցումը երկրորդ դասարանից սկսելն արդարացի վճիռ է:
3. Ռուսաց լեզուն ամենից առաջ պետք է ուսուցանել որպես գրի լեզու:
4. Անգլերենի ուսուցումը պիտի ուսումնական պլանից դուրս հանել և կազմակերպել խմբակի ձևով:
5. Լեզվական արտակարգ ընդունակություն ունեցող երեխաներին՝ հատուկ ուշադրություն:

7. Մարտի 10-ին, ժամը 19.00 փոքր դահլիճ

Կրթօջախի կառավարման համակարգը ներկայացրեց Ա. Բլեյանը:

Պայմանավորվեցին.

1. Համաձայնել Ա. Բլեյանի ներկայացրած փաստաթղթի բովանդակությանը:
2. Սկսել մեկ-երկու դասարանի սահմանադրության մշակումից:
3. Կոչ անել Դավթին ու Հրաչյային՝ ստեղծել կրթօջախի սահմանադրության օրինակ:

8. Մարտի 17-ին, ժամը 19.00 փոքր դահլիճ

Թիվ 183 դպրոցի ներքին ձևավորման մասին՝ Ա. Շահբազյան, Ա. Բլեյան:

Պայմանավորվեցին.

1. Ներքին ձևավորման հարցը համարել չլուծված:
2. Ճիշտ համարել ձևավորման կտոր-կտոր իրագործումը՝ մեծ ազատություն տալով իրականացնողին:
3. Արագացնել մեծ նախասրահի ու մեծ դահլիճի ձևավորման աշխատանքները: