ԿԳՆ պաշտոնական կայքէջում տեղադրվել է հայտարարություն «ԱՊՀ-ն իմ հայրենիքն է» թեմայով շարադրության միջազգային մրցույթի մասին: Մրցույթին կարող են մասնակցել նաև Հայաստանում ռուսերեն ուսուցմամբ դասարաններում և դպրոցներում սովորողները:
«Առաջին լրատվական»— ը Մխիթար Սեբաստացի կրթահամալիրի տնօրեն Աշոտ Բլեյանից հետաքրքրվեց, թե արդյո՞ք նրա կարծիքով արդարացված է նման թեմայով մրցույթի անցկացումը Հայաստանում:
«ՀՀ անկախ պետականության 25-ամյակին պարտադրում են ճշտել՝ «ո՞րն է, բաբո՛, մեր հայրենիք»: Խորհրդային պետության շրջանում երկու հասկացություն կար՝ մեծ հայրենիք՝ Խորհրդային Միություն, և փոքր հայրենիք՝ Հայաստան: 1991-ից հետո մենք անկախ հայրենիք ձեռք բերեցինք:
Փորձ է արվում նորից Հայաստանում երկու տեսակի քաղաքացիություն ստեղծել: Ռուսերենով ուսուցմամբ դպրոցների գոյությունը Հայաստանում հակասահմանադրական է, անօրինական է, ցավոք, մենք չենք անդրադառնում այս արմատին: Նշվում է, որ այս մրցույթը չի վերաբերում հայաստանցիներին, այլ 40 դասարանում և ռուսերենով ուսուցմամբ դպրոցում սովորող, ազգությամբ ոչ հայ շուրջ 600 աշակերտներին: Սա վտանգավոր հարցադրում է, որովհետև այդ սովորողներն էլ են պետական դպրոցներում սովորում, և նրանք էլ են Հայաստանի Հանրապետության քաղաքացիներ:
Մենք հիմա քաղում ենք ԵՏՄ տնտեսական կոչված, բայց իրականում քաղաքական կառույցին անդամագրվելու արդյունքները: Երկու տարում այնպիսի ներխուժում է կատարվում… Եթե «հյուսիսից» գային, ինչպես և այլ երկիներից, օլիմպիադաներ կազմակերպեին, նորմալ կլիներ, բայց արդեն վտանգավոր է այս ներխուժումը, որ արդեն գալիս է որպես մեծ հայրենիք: Եվ դրա մեջ կա թելադրանք, իսկ պետական մարմիններն արագ տարածում են… Սա շատ վտանգավոր բան է մեր անկախության համար:
Այստեղ արհամարհանք կա. իրենք կարող են այդպես անփույթ լինել, բայց ո՞վ է նրանց կանգնեցրել։ Պետական մարմինը պետք է կանգնեցնի նրանց և պատշաճ պատասխան պետք է տրվի: Արժանապատվության հարց է: Ես ունեմ իմ հայրենիքը՝ Հայաստանը, իմ լեզուն՝ հայերենը, անկախ պետության քաղաքացի եմ. այս արժանապատվությանը պիտի թույլ չտա որևէ ոտնձգություն»,-նշեց Ա. Բլեյանը:
Մանրամասները՝ տեսանյութում:
Աղբյուրը՝ 1in.am
[youtube https://www.youtube.com/watch?v=v47SaLGwni8]
