Սեբաստացիներ բոլոր տարիքների՝ սովորողներ, ծնողներ, աշխատողներ, կրթահամալիրում ՀՀ ԿԳՆ պատվերող կազմակերպվող ձմեռային ամենամյա ստուգատեսների մասնակիցներ, կրթահամալիրի հարգելի բարեկամներ, գործընկերներ.
Կրթահամալիրում իրականացվող հեղինակային կրթական ծրագիրը կազմակերպվում է ուսումնական օրացույցով, ուսումնական նախագծերով, անհատական թվային միջոցներով։ Շեշտում եմ, որ հանրապետության հանրակրթական դպրոցներում հունվարին ուսումնական պարապմունքների տևական ընդհատման պատճառով կրթահամալիրի 2015-2016 ուսումնական տարվա օրացույցում հունվարին և փետրվարին պիտի կատարվեին և կատարվել են փոփոխություններ։
- Կրթահամալիրում առցանց-հեռավար դպրոցը շարունակվում է ևս մեկ շաբաթ՝ հունվարի 25-29-ը։ Այս շաբաթվա խնդիրներն են.
- առցանց պարապմունքների շարունակում.
- հեռավար առցանց դպրոցի արդյունքների ամփոփում. ինչպես ասել եմ յուրաքանչյուր սովորող՝ իր ընտանիքով-միջավայրով-մասնակիցներով, յուրաքանչյուր խորհրդատու ուսուցիչ հարգանքով-անաչառ պիտի անդրադառնան իրենց ուսումնական գործունեության այս շրջանին.
- 1-ին կիսամյակի ուսումնական գործունեության արդյունքների ամփոփում-գնահատումը.
- փետրվարի 1-ին մեկնարկող 2-րդ կիսամյակի նախապատրաստումը.
հունվարի 26-ին պիտի արված լինեն սովորողների անհատական ուսումնական պլանի, աշխատողների ուսումնական ծանրաբեռնվածության փոփոխությունները, հրապարակված լինեն ուսուցման կազմակերպմանն առնչվող բոլոր փոփոխությունները, դպրոցների դասացուցակները. - հանրակրթական, արդեն փետրվարյան, ստուգատեսների, առարկայական օլիմպիադաների նախապատրաստական աշխատանք։
- Նկատի ունենալով, որ հանրակրթական մեր ստուգատեսները բաց են, հանրապետության, Արցախի մյուս սովորողների, այլոց մասնակցության հնարավորության համար հունվարյան ստուգատեսները տեղափոխվում են փետրվարի 8-19։
- Հիշեցնում եմ, որ «Հանրակրթական Դիջիթեք» ամենամյա 8-րդ ստուգատեսի տնօրենն են սովորողներ Էմմա Իսախանյանը, Նարեկ Սահակյանը, որ ի դեպ առցանց է ղեկավարում։ Մանկավարժական աշխատողների աշխատանքի համակարգման համար առաջարկել եմ, որ ստուգատեսի կազմակերպիչ դառնա նաև «Դպրոց-պարտեզ» ուսումնական կենտրոնը, համակարգող՝ Մարիետ Սիմոնյանը։
- Բնագիտա-տեխնիկական ստեղծագործության ամենամյա 3-րդ ստուգատեսի կազմակերպիչ-կենտրոնը բնագիտության և տեխնիկայի ուսումնական կենտրոնն է, համակարգողը՝ Գնել Հարությունյանը։
- Ամենամյա 3-րդ մարմնամարզական ստուգատեսի կազմակերպիչ կենտրոնը մարզական ուսումնական կենտրոնն է. առաջարկել եմ, որ ստուգատեսը համակարգի Խորեն Հազարումյանը։
Խնդրում եմ համապատասխան փոփոխություններ անել ստուգատեսների աշխատակարգերում՝ տեղեկացնելով բոլոր հնարավոր մասնակիցներին, գործընկերներին, բարեկամներին, կրթահամալիրի դպրոցների, ուսումնական կենտրոնների, ակումբների ուսումնական օրացույցներում։
- Փետրվարի 6-ին մեր ստուգատեսային-տոնական-ավանդական ղափաման է։ Այս անգամ ստուգատեսներն ավարտելու փոխարեն կսկսենք միավորող տոն-ծեսով։
Բոլորին առողջ, հետաքրքիր առցանց աշխատանքի նոր շաբաթ եմ մաղթում, որը անհատականացվելու, ինքնուրույնանալու, ավելի ընտանեկան դառնալու նոր լիցք ստացավ։ Առջևում շատ մրցանակներ խոստացող ստուգատեսային փետրվարն է, որի երաշխավորն եմ եղել և մնում։
Դե, իսկ աշխատողներով վաղը հանդիպում ենք. հանդիպման վայրն ու ծրագիրը չեն փոխվել։
