Զատկե զատի՜կ է,
Նավակատի՜կ է,
Չամչե հատի՜կ է…
Սեբաստացիներ բոլոր տարիքների, բարեկամներ
Մարտի 26-ին՝ Ճրագալույցի պատարագից հետո «Ուսուցչի լույսը Գեղարվեստում» տնօրհնեքը, մարտի 27-ի Սուրբ Հարության տոնը Սուրբ Երրորդություն եկեղեցու բակում դպրոցի և եկեղեցու համագործակցության, հոգևոր կրթության ոգևորող հարթակներ են։ Կարևոր եմ համարում, որ յուրաքանչյուր սեբաստացի ընտանիք տեղեկացված և անհատապես հրավիրված լինի, ոչ միայն սովորողի միջոցով, որ ամեն մի սեբաստացի կարևորի իր գործնական մասնակցությունը։ Շատ կոնկրետ պիտի լինեն մասնակիցները՝ կրթահամալիրի դպրոցները՝ իրենց կոնկրետ խմբերով, այսօր գործող ակումբները, սովորողների ընտրությամբ և լրացուցիչ կրթության խմբերը՝ սկսած մարզականից, շարունակած երաժշտական-պարայինով, վերջացրած բնապահպաններով, գիտակներով։
Առանձին ուսումնասիրության թեմա է, թե ինչպես է մասնակցում հասարակությունը իր եկեղեցու ծեսերին, ինչպես է նշում տաղավար տոնը՝ բացի սեղան դնել-ուտելուց։ «Հայ եկեղեցու պատմություն» դասընթացը սովորողների, ուսուցիչների, դպրոցների համար դառնո՞ւմ է գործնական մասնակցություն եկեղեցու արարողություններին ու տոներին…
Մենք մեր եկեղեցու բակում սպասում ենք զատկական տոնով ոգևորվածներին։ Հրավիրեք, մասնակից դարձրեք մեր տոնին… Մեր ավետիսը տարածեք.
Քրիստոս յարեաւ ի մեռելոց. ավետի՜ս…
