Օստեոխոնդրոզի հետ խաղ չեն անի՝ այս մեկը լավ գիտեմ. դեմը պետք է առնել, քանի չի զարգացել, թե չէ սև «բեկում 2015» կբերի բոլորիս գլխին…
Շաբաթ-կիրակին ես օգտագործում եմ նպատակային… Շաբաթ օրը փոքր, մասնագիտական խմբերի հետ անշտապ ու հանգամանալից քննարկում եմ մայիսյան 10-րդ հավաքի պատրաստության ընթացքը։ Բեկում արձանագրվեց Արհեստագործական—Նոր դպրոցկասկադի այգեգործական աշխատանքներում… Մայիսյան հավաքի ծրագրով՝ որպես նորամուտ, մենք ներկայացնելո՞ւ ենք իր երկարատև անավարտությունը հաղթահարած այս նախագիծը։
Այսօր մեկնարկեց «Տիգրան Հայրապետյանի օրեր» հասարակագիտական ամենամյա բաց ստուգատեսը, որ իր արժանի տեղն է զբաղեցնում կրթահամալիրի ուսումնական օրացույցով որոշված մյուս ստուգատեսների շարքում՝ որպես ինքնուրույն ու ծավալուն ուսումնական բնագավառ…
Օրվա վերջում Կոմիտասի թանգարան-ինստիտուտի նոր համերգային դահլիճում Երևանի կամերային երգչախմբի կատարմամբ հոգևոր երգերն ինձ համար թերապիայի գործուն միջոց եղան…
Հետաքրքիր ստացվեց. երկու օրում վերականգնեցի տարիների իմ բնականոն ռեժիմը. քուն՝ ճիշտ կեսգիշերից մինչև առավոտվա 5-ը: Բարի գիշեր ուղիղ կեսգիշերին, որքան էլ Դավիթ Բլեյանն ինձ համառորեն շեղում էր… Փորձում էր: Իսկ կիրակին անցկացրի անկողնային ռեժիմում. իմ բոլոր կենսական ուժերի համախմբում՝ ընդդեմ չարիքի առանցք օստեոխոնդրոզի…
Նկատե՞լ եք` բոլոր տեսակի փաստաթղթերից, ծրագրերից, որ, աշխատանքի բերումով, հա՛մ պիտի գրեմ, հա՛մ կազմակերպեմ, որ գրվի… նախընտրում եմ ուղեցույցները… Եթե հիշում եք՝ 1993-97 թթ բլեյանական նշանավոր, աղմուկ հանած, հասարակական գիտակցության մեջ հետք թողած ուսումնական գրականությունը՝ «դասագիրք» կոչվածները և մեթոդականները՝ ուղղված ուսուցչին և մեր դեպքում, նաև ծնողին, սովորողին, կազմված էին որպես ուղեցույցներ… Ահա, 1-4-րդ դասարանների աշխատանքային տետրերը (գրքերը), 5-9-րդ դասարանների թվաբանության, հայոց լեզվի և ռուսերենի խնդրագրքերը, ընթերցարանները նույնպես ուղեցույցներ էին… Դե, ամոթ էլ է, մասնագետ ուսուցիչը եթե չի կարողանալու ուղեցույցների օգնությամբ կազմակերպել դասընթացի ծրագիրը կոնկրետ դպրոցում, դասարանում, սովորողի համար, էլ ինչի՞ եք դպրոցի վրա ծախսեր անում… 1-4-րդ դասարանների մեթոդական ծրագիր-ուղեցույցները, 5-9-րդ դասարանների լեզվի ուսուցման ուղեցույցները հիմա էլ հաճույքով եմ թերթում, շուռումուռ տալիս՝ մարդավարի, մարդու կողմից ու մարդու համար արված կենդանի գործեր են… Ահա և ոչ առարկայական, ոչ կոնկրետ դասընթացի հետ կապված երկու ուղեցույց, որ այսօր էլ հավանում եմ, գործածում: Մայիսյան հավաքի պատրաստության այս շրջանում շտկել-ամբողջացնելուց հետո դնեք նորից շրջանառության մեջ, որ այն շարունակի մեր սեբաստացիական աշխարհի փոփոխությունների վեկտորն ու կերպը որոշել… ինչպես ահավասիկ տարատարիք սովորողին, ընտանիքին ուղղված «Թող գա սովորելու նա…» ուղեցույցը… Ու սրա կողքին՝ համարժեք, հանրակրթական պետական չափորոշիչով հաստատված-որոշված (նորմատիվ՝ Հայաստանով մեկ)` սովորողին ներկայացվող ընդհանրական պահանջները… Ո՞ւմ են ուղղված, քանի՞ ուսուցիչ, այլ քաղաքացի է կարդացել, որ կարդա, ի՞նչ անի, սրանով ի՞նչը չափես, ինչպե՞ս, ինչպիսի՞ գործունեություն կազմակերպես… Կամ «Կրթահամալիրի 2013-2016 թթ զարգացման հիմնադրույթները»… Եթե 2013-ին կարդացել, գործել, շարժվել եք սրանով, չեք ափսոսա. հասել ենք մի կետի, որտեղից կարելի է և´ ետ նայել, և´ առաջ՝ տեղում չմնալու համար… Հիմա սրա կողքին փորձեք ՀՀ օրենքի ուժ ունեցող լուրջ պետական ծրագիր դնել՝ «Հայաստանի Հանրապետության կրթության զարգացման 2011-2015 թվականների պետական ծրագիրը»: Իմ նման ծրագրասեր, գրասեր մարդն անգամ սրա կարիքը չունի. ո՞ւմ է ուղղված` հարցնում եմ… Սեբաստացի ուսուցիչներ, 2015-ի մայիսյան հավաքին պիտի ներկայանաք ձեր կազմած ուղեցույցներով՝ ձեր ու ձեր գործընկեր ուսուցիչների և սովորողների համար արված… Մայիսյան հավաքին մենք պիտի ներկայանանք մանկավարժության նոր սերնդի` ուսումնական գործի հեղինակային կազմակերպման համապարփակ ուղեցույցներով` տարատարիք սովորողի, ամեն ուսուցչի, ծնողի, մանկավարժական աշխատողի համար գործածական… Ես միշտ եղել եմ այն համոզման, որ դաս-դասարանային ուսումնական համակարգում մեկ դասագիրքը ենթադրում է, որ սովորողի պես ուսուցիչն իր առարկայի համար միայն դասագիրքն է գործածում, մեկ էլ «թեմատիկ» կոչված պլանը՝ որ թեմային քանի ժամ… Ահա ինչու սրա այլընտրանք մեր հեղինակած կրթական ծրագիրը «ինչպեսը»` կազմակերպումն է…
