Իսկ հանդիպո՞ւմ են նրանք երբևէ,- հարցնում է Սևակը։
Իմ դեպքն ուրիշ է. իմ օրը ցայգով* է սկսվում։ Ի՞նչ անես, երբ քունդ առել ես, հո զոռով չե՜ս քնի, չգիտես էլ՝ ժամը քանիսն է, է՜, վեր ես կենում… Մեր տան ժամացույցներից ամենաշատը վստահում եմ իմ IPhone-ին, կրթահամալիրում որևէ հայտարարված հավաք-ներկայացում-համերգ սկսելիս՝ Նառա Նիկողոսյանի IPhone-ին՝ շարունակ նոր սերնդի դարձող… Հիմա գիշերվա 3-ն է, ու կարծես ի դերև ելան իմ այս նախագծային ուսումնական ճամբարի շաբաթվա ջանքերը՝ 23.59-ից ուշ և 24.00-ից շուտ չքնելու և առտու 5-ից շուտ չարթնանալու… Բարի օր, կրթահամալիր՝ քո բոլոր քնած-արթուն ճամբարականներով. տեսնո՞ւմ եք՝ mskh-ում շնորհիվ Արմինե Թոփչյանի առցանց, բարեխիղճ, խելացի-ներառական աշխատանքի՝ որքա՜ն հասկանալի-ամբողջական-լեցուն ուրբաթ է, ձեզ նման այս խելահեղ, անհավատալի թվացող (մի՞թե հնարավոր է այսպես-այսքան, ու մինչև ե՞րբ) առօրյայից ես էլ ձեզ նման ստեղծում եմ օրվա իմ պլանը, ու ամեն օրվա մեջ ես էլ ունեմ հանդիպումներ, որոնց սպասում-գնում եմ մի ուրիշ անհամբերությամբ… Այսօր, ժամը 13.00, մեր «Սեբաստիա» համերգասրահում սեբաստացի սովորողների երգչախմբային ստուգատես է… Ուշքս գնում է այսպիսի տեսարանի-ապրումի համար, դա թերապևտիկ ազդեցություն ունի: Շնորհակալ եմ բոլոր խմբավարներ-երաժշտության ուսուցիչներին, մեր ավագ, մենթոր խմբավար հարգելի-հանրահայտ մաեստրո Հարություն Թոփիկյանի առաջնորդությամբ, ուզում եմ թվարկել՝ Մարինե Մկրտչյանին, Նելի Փիլոյանին, Լուիզ Քեշիշյանին, Տաթև Մանվելյանին, Մարինե Ոսկանյանին, Հասմիկ Մաթևոսյանին… Եվ այսօրվա վոկալը՝ որպես 2017-ի հունվարի մակարդակ-ձեռքբերում, թող հնչի որպես ձոն-ծննդյան ավետիս` մայրիկ դարձած խմբավար-երաժիշտ-երգիչ Տաթև Ստեփանյանի համար… Ա՜յ քեզ նախագիծ՝ «Օրորոցի մոտ» պայմանական անունով, որ վստահ եմ, սկսում է Տաթև մայրիկն իրականացնել կարողությունների-հայացքի այլ մակարդակում: Հետևենք Տաթևի բլոգին:
Սեբաստացիները Դիլիջանի ճամբարում:
Լուսանկարները՝ Իվետա Ջանազյանի:
Սառած Բայկալ լիճը տպավորում է իր գեղեցկությամբ… Մոսկվայի մի աղջնակ՝ Քրիստինա Մակեևնան երեք օր շարունակ լուսանկարել է լիճը… որքա՜ն հիասքանչ ու կախարդական կարող է լինել Բայկալը ձմռանը: Իսկ Մարգարիտ Մանվելյանը, Մելինե Մարտիրոսյանը, … ինչո՞ւ չեն պատմում մեզ ձմեռային Սևանի մասին… որպես շարունակվող նախագիծ։ Մեր ավագ դպրոցի ռազմամարզական-հայրենագիտական-բնապահպանական հանրակրթական «Սեբաստացիները Սևանի ժայռում» 2016-ի արշավախմբային ճամբարի, երեկվա հավաքի մասնակիցներն ընդունեցին Սևանի շուրջ ճամբարային լուսանկարչական էքսպեդիցիա կազմակերպելու իմ առաջարկը… Դե, այլ է մեր ուսումնական ճամբարներում մարդկային շփումը՝ ո՛չ լեզուն է խոչընդոտ, ո՛չ տարիքը… ո՛չ տարածությունը… Կարևորը մարդուն համակող նախագծի առկայությունն է, նախագծով իր հետաքրքրությունների դրսևորումը… Հեքիաթ կլիներ, իսկը՝ ձմեռային-համազգային, որ մեր կյանքի նախագծային կազմակերպում-փոփոխությունը մեր սեբաստացիական օրինակով տեղափոխվեր Ազգային ժողովի փաստացի մեկնարկած ընտրությունների կուսակցական-դաշինքային հարթակներ… Ափսոս է այս շրջանը, այսպիսի հնարավորությունը, որ չմսխվի խոզերի խոսակցության վրա կամ որ դառնա նոր տարվա զզվանք առաջացրած համերգ-սեղանների, տաշի-տուշիի մի այլ կրկնություն…
Ձյունը կտավի փոխարեն. Արևելյան դպրոց-պարտեզ:
Պատկերացրի՞ք, այնքան հարգեն ընտրողին, մարդուն, որ ներառվեն նրա կյանքում, ներկայացնեն այդ կյանքի լավացման նախագծեր, այնպիսին, որ մարդ համակվի դրանով, ներքաշվի իր կյանքի փոփոխության մեջ… Այս շարունակ հարևան-օտար թուրքերը շեղեցին ինձ, քաղաքական-պետական դաշտ տեղափոխեցին իմ գիրը… իրենց զարմացնող կենսունակությամբ, Թուրքիայի նախագծային փոփոխությունների՝ իրենց այնպիսի թափով… որ չեն շեղում ո՛չ ահաբեկչությունները, ո՛չ սիրիական պատերազմը։ Թուրքիայի տասնութ նահանգներ կկապվեն ճեպընթաց-երկաթգծով մինչև 2023 թվականը… ծրագրված է առաջիկա հինգ տարում կառուցել 25 հազար կմ երկաթուղի, որոնցից 3500 կիլոմետրը՝ ամենամեծ արագության, իսկ 5500 կմ-ը՝ ճեպընթաց… Ու Ստամբուլի մոտ գտնվող Թուզլայի նավաշինարանում սկսում է առաջին ֆրեգատի՝ կառուցման մեկնարկի արարողությունը, որը ստացել է Ստամբուլ անվանումը… Ծրագրված է, լսեք, 12 միլիարդ դոլար հատկացնել ֆրեգատների՝ պարեկային ու արագընթաց մոտորանավերի, օժանդակ այլ նավերի իրագործմանը… Վտանգավոր շրջան է և՛ Թուրքիայի, և՛ մեզ համար. Թուրքիան պաշտպանությունից անցնում է հարձակման…
Հյուսիսային, Արևմտյան դպրոց-պարտեզների հունվարի 20-ի կլոր սեղաններից:
Ֆոտոխմբագիր՝ Հասմիկ Թոփչյան
# 911
*Այգ — 1. Առավոտյան պահը՝ արևածագից առաջ, վաղ առավոտ:
Ցայգ — 1. Առավոտյան նախորդող ժամանակը, գիշեր: