Սովորողների համար ուսումնական պարապմունքների նոր շրջան է սկսում հոկտեմբերի 31-ին` աշնանային արձակուրդից հետո առաջին ուսումնական օրը։ Հրապարակում եմ կրթահամալիրի սովորողների տեղափոխման երթուղիները, դրանց պատասխանատուներին,  պարզաբանումները` այս գործի համակարգող Լուսինե Մամիկոնյանի ներկայացմամբ։ Դպրոցների ղեկավարները կհրապարակեն ամեն երթուղու սովորողներին ընդունող, նրանց հետ քայլող աշխատողների անունները, աշխատակարգերը։

• Կրթահամալիրի Մայր դպրոցի կանգառում (Բաբաջանյան պողոտա) իջնում են Միջին, Ավագ, Նոր դպրոցների, քոլեջի սովորողները։ Նաև` Մայր դպրոցում առաջին պարապմունքը ունեցող Դպրոց-պարտեզի, Գեղարվեստի, Հիմնականի  5-րդ դասարանցիները։ Նրանք դպրոց են գնում ոտքով` դպրոցների ղեկավարների որոշած կարգով, պատասխանատուի ուղեկցությամբ։
• Դպրոց-պարտեզի սովորողները ըստ երթուղու իջնում են Բաբաջանյան պողոտայի վերնանցումի մոտ (Բ-1 թաղամասի կողմում) կամ Բ-4-ի «Food» խանութի կանգառում։ Դպրոց հասնում են ոտքով, առանց սպասելու` դպրոցի ղեկավարի որոշած կարգով, պատասխանատուի ուղեկցությամբ։
• Գեղարվեստի դպրոց-պարտեզի սովորողներն իջնում են Րաֆֆու փողոցի. ABB բանկի դալանի կանգառում, այդտեղից գնում են ոտքով, առանց սպասելու` դպրոցի ղեկավարի որոշած կարգով, պատասխանատուի ուղեկցությամբ։
• Հիմնական դպրոցի սովորողները դպրոցի կանգառ հասնում են որոշված երթուղու տրանպորտային միջոցներով, դպրոցի ղեկավարի որոշած կարգով, պատասխանատուի ուղեկցությամբ։

Ունենալով սովորողների տրանսպորտային տեղափոխման սեպտեմբերի-հոկտեմբերի փորձը` առաջարկում եմ ձեր դիտողությունները, պահանջները, հարցերը, լրացումները, առաջարկությունները ներկայացնել անձամբ ինձ, հարգելի գործընկեր` կրթահամալիրի դասավանդող, կրթահամալիրի դպրոցներում սովորողի ծնող, սովորող։ Վստահեցնում եմ Ձեզ, որ մինչև մեկնարկող մեր տոնը` «Սեբաստացու օրերը», կունենանք հեղինակային կրթական ծրագրով ներառական, բոլորիս համար ընդունելի` սովորողների դպրոցից դպրոց տեղափոխում։