- «Արվեստը» 7-11-րդ դասարանում
«Արվեստը» կրթահամալիրում իրականացվող հեղինակային կրթական ծրագրերի ուսումնական պլաններով որոշված առարկա է 7-11-րդ դասարաններում։ Այն, 7-9-րդ դասարաններում, ըստ ուսումնական պլանի. «ընդգրկում է կինո, թատրոն, կերպարվեստ դասընթացները, կազմակերպվում է թատրոնի-կինոյի դիտման, թանգարան-ցուցադրություն այցելության, ծեսի, տոնի, համերգի, ցուցադրության կազմակերպման ուսումնական նախագծերի միջոցով»:
Խնդրում եմ դպրոցների ղեկավարներին՝ Մարգարիտ Սարգսյանին և Մարթա Ասատրյանին տեղեկանք ներկայացնել՝ սեպտեմբերին ինչ ուսումնական նախագծեր են իրականացվել, ով է ղեկավարել-կազմակերպել այդ նախագծերը, ինչ արդյունքներ կան։
2015-2016 ուստարում 10-11-րդ դասարաններում «Արվեստը» ընդգրկում է Աստվածաշնչի գիտելիքի, ծիսական մշակույթի, մշակութային ժամանակակից կյանքի, ժամանակակից արվեստի (ճարտարապետություն և քաղաքաշինություն, կերպարվեստ, կինո, թատրոն, գրականություն) դասընթացներ։
Ավագ դպրոց-վարժարանի դասացուցակում 10-11-րդ դասարաններում (հինգ դասարան) «Արվեստը» դրվում է նույն ժամին (ուրբաթ՝ ժամը 12:55-13:35)։ Սովորողը կարող է իր ընտրած հերթականությամբ մեկական կիսամյակ մասնակցել առաջարկվող դասընթացներին, առանց դասացուցակը փոխելու։
Դասընթացները վարում են մշակույթի ոլորտում իրենց համապատասխան գործունեությամբ հայտնի մարդիկ, գործող արվեստագետներ, ում առաջարկում ենք մշակել և վարել կրթահամալիրի 10-11-րդ դասարանցիներին ուղղված դասընթաց։
Դասընթացները կազմակերպվում են ծրագրով որոշված մասնագիտական միջավայրում։
- Փոփոխություն ուսումնական օրացույցում
Կրթահամալիրի 2015-2016 ուստարվա ուսումնական օրացույցում մանկավարժական աշխատողների շուրջտարյա դպրոցի ամենաշաբաթյա պարապմունքները և ամենշաբաթյա ընդհանուր մեդիապարապմունք-համերգը տեղափոխվել են։ Այսուհետ կլինի.
- Չորեքշաբթի` ժամը 15.15-16.00 — ընդհանուր մեդիապարապմունք-համերգ
- Ուրբաթ` մանկավարժական աշխատողների շուրջտարյա դպրոց
ժամը 12.00-13.00` երկարացված օրվա կազմակերպիչների
ժամը 14.00-15.00` դաստիարակների
ժամը 15.15-16.15` դասավանդողների
Այսպիսով՝ հերթական սեմինարները կլինեն հոկտեմբերի 2-ին, հերթական մեդիապարապմունքը՝ հոկտեմբերի 7-ին։ Իսկ սեպտեմբերի 30-ին, ինչպես որոշված էր նախօրոք, կրթահամալիրի աշխատողների ամենամսյա ժողովն է։
