Կրթահամալիրի Ավագ դպրոցի հարգելի շրջանավարտ, ծնող, դասավանդող, տնօրեն, սեբաստացիներ բոլոր տարիքի, որտեղ որ եք
Մայիսի 27-ին՝ ժամը 11.00, Մայր դպրոցի Մարմարյա սրահում սկսվում է 2015-2016 ուսումնական տարվա 12-րդ դասարանի շրջանավարտների «Ցտեսություն-ցնծություն» տոնախմբությունը: Մեզնից յուրաքանչյուրն առավելագույնը կանի տոնն ամենաուրախ-հիշարժանը դարձնելու, այն որևէ միջադեպով չփչացնելու համար: Դրա համար խնդրում եմ սովորողին՝ ձեռնպահ մնալ ավտոմեքենա վարելուց, ծնողներին՝ ավտոմեքենան, եթե դրա խիստ անհրաժեշտությունը կա, կայանել Մայր դպրոցի դիմաց՝ Ա. Բաբաջանյան պողոտային հարող երկրորդական փողոցում, բոլորին՝ Մայր դպրոցում, նրա տարածքում բացառել ծխախոտն ու ալկոհոլային խմիչքը, տոնին մասնակցել ոչ միայն որպես հանդիսատես. շրջանավարտներին ոգևորենք մեր երգելով-պարելով-ծափահարելով։
Տարիներ ձևավորված ավանդույթով շրջանավարտներն այդ օրը զբոսնում են, մեկնում ճամփորդության։ Վստահ եմ, որ այդ ժամանակ էլ կդրսևորվի նույն սեբաստացիական համերաշխությունը, բարեկրթությունը, չեն լինի ծխախոտ ու ալկոհոլային խմիչք, կերուխումի այլ ատրիբուտներ. տոնը կկազմակերպվի հեղինակային կրթական ծրագրի հեղինակ սովորողին վայել։