Բարի օր, սեբաստացիներ բոլոր տարիքների, որտեղ որ եք:
Օրը կիրակի է, ամենամյա բաց ստուգատեսային ճամբարի նախապատրաստման վերջին օրը:
Արձանագրենք. հունիսի 15-19-ին կրթահամալիրում աշխատանքի երեք հիմնական ուղղություն կա`
- հունիսի 15-ին մեկնարկում են թարգմանական, արտ-միջավայրի, երաժշտական, թատերական, կինո-ֆոտոյի ստուգատես-փառատոները,
- կրթահամալիրի դպրոցներում մեկնարկում են ամառային դպրոց-ճամբարները,
- շարունակվում են ավարտական քննությունները:
Ստուգատեսային ճամբարը կազմակերպվում է Մայր դպրոցում և Գեղարվեստի դպրոցում:
Կրթահամալիրի տնօրենի գրասենյակի ղեկավարը, կադրերի տեսուչը.
- գրագետ ամենօրյա հաշվառում պիտի ապահովեն` առավոտյան պարապմունքին, ստուգատեսային գործունեությանը` պարապմունք-հանդիպում-ներկայացում-դիտում-համերգ-քննարկում-նախագծին` գրանցելով մասնակցության ձևը` որպես ունկնդիր, որպես մասնակից.
- հետևեն, որ դրանք կազմակերպվեն պատշաճ, օդափոխված, հարմար տարածքներում, ապահովված լինեն հիգիենայի, անվտանգության պայմանները, անհրաժեշտ գործիքներ.
- Մարմարյա սրահում ֆիլմի դիտման ժամանակ դպրոցը պատրաստ լինի դրան, ելումուտը, աղմուկը բացառվեն:
Յուրաքանչյուր օրվա մանրամասն ծրագիրը և ստուգատեսային ճամբարի գործունեության մասնակիցների ցուցակները հրապարակվում են նախորդ օրվա երեկոյան, Կարինե Պետրոսյանի կողմից, որ համակարգում-համաձայնեցնում է գործունեությունը: Ոչ մի թեական, կիսատ, անորոշ բան ծրագիր չի գալիս. բոլոր նախագծերը հրապարակված են-հրապարակվում են դրանից առաջ: Ստուգատեսային գործունեության ծրագիրը ներառում է տեղեկություն` ում է ուղղված, ովքեր են մասնակիցները, ինչպես են մասնակցում, ինչպես են պատրաստվում, ինչ արդյունք է ակնկալվում:
Պայմանավորվել ենք. յուրաքանչյուր օրվա մուտքը ժամը 9.00-9.15 կազմակերպում է ստուգատեսներից մեկի կազմակերպիչ խումբը: Լսարան են բերվում այդ ստուգատեսի կարևորած նյութերը, բոլորին ուղղված ասելիքը, ոգի, ճաշակ, հեղինակային կրթական ծրագրերի կազմակերպման նորություններ ու առաջարկություներ… Բոլոր մանկավարժական աշխատողների և ստուգատեսների մասնակից սովորողների մասնակցությունը դրան պարտադիր է:
Ժամը 9.15-9.30 օրվա անելիքը ներկայացնում է կրթահամալիրի տնօրենը:
Ստուգատեսների, նախագծերի ղեկավարները պատասխանատու են դրանց իրականացման պայմանների համար. անհրաժեշտ է նախօրոք ճշտել` սրահներում-դահլիճներում ինչ է պակաս, ինչ է ավել, ինչ աշխատանք պիտի արվի: Նրանք պատասխանատու են ծրագրի, ստուգատեսի և նրա օրվա, առանձին գործունեության տարածման և լուսաբանման համար, ստուգատեսի արդյունքների ներկայացման և ամփոփման համար:
Դպրոցների ղեկավարները, կազմակերպիչները պատասխանատու են սովորողների պատշաճ մասնակցության, նրանց գործունեության արդյունքների գրանցման համար:
Ստուգատեսային ճամբարին մասնակցում է վրաստանյան մի լավ խումբ` Թբիլիսիի 132 հանրային դպրոցի սովորողներ և ուսուցիչներ: Ընդունող կողմը` վրացախոսների ակումբը, ակումբը պատրաստվում է:
