Դպրոցների հարգելի ղեկավարներ, դասավանդողներ, այլ աշխատողներ.
Դպրոցների նորաստեղծ ճիմապատ տարածքների ոռոգումը և պահպանությունը հատուկ ուշադրության կարիք ունեն, հատկապես որ, ինչպես տեղեկացանք, առաջիկա չորս օրերին ոռոգման ջուր չենք ունենալու: Հիշեցնեմ, որ ճիմապատված տարածքներ կան քոլեջում, Գեղարվեստի դպրոցում, Դպրոց-պարտեզում, Նոր դպրոցում և Մայր դպրոցում:
Այսօր ես անցա բոլոր այդ դպրոցների բակերով, հատկապես կանգ առա ճիմապատ տարածքներում: Վստահեցնում եմ ձեզ, որ առավելագույն ջանքեր են գործադրվում մեր արտաքին (բաց) տարածքների կանաչապատման աշխատանքների նախապատրաստական փուլը (հողային աշխատանքներ) ավարտելու, օր առաջ փոշին, անցումների (արահետների) անհարմարությունը վերացնելու համար: Լուծվող հարց է: Անդառնալի կարող է լինել ճիմապատ տարածքների ոռոգման ռեժիմի և որակի անտեսումը՝ թեկուզ մեկ օրով:
Դպրոցների ղեկավարների որոշած պատասխանատուներն ամեն օր՝ առավոտյան և երեկոյան, բարեխիղճ, այնպես, որ ջուրը ճպճպա, խմելու ջրով ցնցուղով ոռոգում են ճիմապատ տարածքն ամբողջությամբ: Այս աշխատանքը պիտի գրանցում ստանա դպրոցի գրասենյակում: Դպրոցի ղեկավարը պիտի անձամբ ամեն օր համոզվի, որ պահանջը կատարված է:
Ակնկալում եմ, որ սուրհանդակն ստանալուն պես դպրոցների ղեկավարները անհապաղ արձագանքեն, ներկայացնեն պատասխանատուներին, աշխատանքի կազմակերպումը։
